英超:伦敦打吡激战捧热刺客Ｗ

英超(英超,ENG PR):伦敦打吡激战捧热刺客Ｗ 2022年08月31日 英超「伦敦打吡」一样精彩，「锤仔帮」韦斯咸主场硬撼热刺。韦斯咸虽然上仗开斋，但佢哋近况麻麻，而且联赛主场战绩欠佳，相信热刺可望趁机反客为主，客胜有计。 韦斯咸锋力疲弱 近年喺英超站稳中上游嘅韦斯咸，估唔到开季表现奇差，头3轮联赛输晒兼一球不入，直到上仗对阿士东维拉先至小胜1比0、成功开斋，但锋力仍极为不足。主帅莫耶斯早前只签入後衞泰路基拿及艾马臣柏美尼，未有对症下药，上季士哥不断嘅查洛保云，今季似乎忘带射门鞋，啱啱以破球会转会费纪录5,100万镑加盟嘅卢卡斯柏基达，亦未必可以即刻融入，加上「锤仔帮」主场表现失色，连同上季在内，近4仗联赛主场仅得1和3负，不宜高估。 相反，热刺开季演出稳定，头4轮联赛取得3胜1和，其中造访劲旅车路士，两度落後之下仍能逼和2比2，可见喺铁帅干地领导下韧力十足。虽然前锋孙兴民今季未开斋，但咁样更加激起佢嘅斗心，何况前锋拍档哈利卡尼每逢出战打吡战特别醒神，佢依家喺「伦敦打吡」已经累积攻入42粒，仅落後阿仙奴(阿森纳,Arsenal)名宿亨利1球，若果今仗有波入，就可以荣登「伦敦打吡士哥王」，加上近两次碰头热刺赢晒，今仗客胜咪错过。