罗拔佬倒戈严阵以待 拜仁狂锋狙击巴塞

罗拔佬倒戈严阵以待 拜仁狂锋狙击巴塞 2022年09月13日 太阳日报 今晚欧联「死亡C组」上演重头戏，拜仁慕尼黑于主场硬撼巴塞隆拿。巴塞虽有射手罗拔利云度夫斯基倒戈，但拜仁熟晒佢条路，而且呢支德甲(德甲,GER D1)班霸以沙迪奥文尼为首嘅锋线火力全开，挟近年欧联碰头食住巴塞之势，主胜值得捧场。
今仗焦点必属罗拔利云度夫斯基，佢今夏为咗离开拜仁，搞到同球队高层反晒面，为今仗增添火药味。「罗拔佬」加盟巴塞后亦交足货，各项赛事近5仗攻入9粒，包括上轮欧联赢柏辛域陀尼亚5比1之役大演帽子戏法，队友如奥士文尼迪比利、安素法迪等乐于为佢铺桥搭路，但变相令巴塞踢法过于倚赖呢位射手数胡，目标太大，反而令对佢了如指掌嘅拜仁可重点防范。
巴塞开咧战绩系唔错，不过之前所赢对手只系皇家苏斯达、西维尔等明显跌Watt球队，究竟巴塞系咪弗到可以喺欧联也文也武，作客对战拜仁相信系今季首个考验。
全民皆攻9仗轰31球
相反，拜仁虽然冇咗「罗拔佬」，但攻力未见受削，新兵沙迪奥文尼极速融入，汤马士梅拿、基拿比、穆斯亚拿及利莱辛尼为争逐正选，战意爆灯，而且全部已经开斋脚风正顺，难怪拜仁各项赛事近9仗获6胜3和之余，更狂轰31球，包括上轮欧联靠利莱辛尼入波兼助攻，作客轻取实力唔曳嘅国际米兰(國際米蘭,Inter Milan)2比0。如今连向来表现飘忽嘅利莱辛尼都咁生性，真系防不胜防，加上两军近4次喺欧联交手，拜仁全部赢晒，摆明格食格，主胜不容错过。