英超:踢完太公波夏兰特未回气 曼市打吡细均力敌

英超(英超,ENG PR):踢完太公波夏兰特未回气 曼市打吡细均力敌 2022年10月02日 太阳日报 今晚英超激爆「曼市打吡」，曼城主场恶斗曼联。「蓝月亮」虽有神锋艾宁夏兰特加盟，令攻力倍增，不过呢位挪威射手为国家队上阵完全冇休息，势影响表现；曼联今季做咗「大赛球队」，斗强队特别醒神，今场作客必会加强防务。两军近7次交手6次开3球或以下，3.5球入球细值得一试。
今场系荷兰主帅坦哈格带领曼联嘅首场「曼市打吡」，佢嘅逼抢战术遇上哥迪奥拿传控足球，相信会系一场非常体力化对决。虽然曼联走势强劲，但如果同「蓝月亮」斗攻，肯定自掘坟墓，所以无可避免会主守，卡斯米路同麦汤米尼充当第一道屏障，前线靠伤愈复出嘅拉舒福特同冇踢国际赛嘅查顿辛祖，希望凭突击搵到食。
曼联势加强防务
曼城自艾宁夏兰特加盟後，「4-3-3」阵式终於由「无锋阵」变成有可靠中锋做完结，呢位挪威国脚亦不负众望，联赛7战劲轰11球，带领「蓝月亮」5胜2和保持不败。不过佢喺国际赛期为挪威踢足两场欧国联(歐國聯,UEFA NL)，体力消耗极大，此外曼联肯定会对夏兰特作出针对性部署，甚至不惜搵专人冻结，以减低佢嘅威胁。
曼联今季大战醒神，先後击败利物浦及阿仙奴，挟联赛4连胜走势，作客曼城唔系冇得打。事实上两军近年交手入球唔多，预料今场都系一球起、两球止，细盘谂得过。